F Flugan

Klassísk þurrfluga eftir Marjan Fratnik, hnýtt í kringum 1980 og ein útbreiddasta CDC-fluga Evrópu. Uppbyggingin er einföld: grannur dubbaður búkur og 1-3 CDC fjaðrir bundnar við hausinn þannig að vængurinn liggur flatur yfir bakið og nær rétt aftur fyrir krókbug. Stubbarnir eru klipptir stutt og mynda úfinn haus — þeir fáu þræðir sem standa fram og niður virka sem fætur.

Flugan líkir ekki eftir neinu einu ákveðnu. Lága, tjaldlaga vænglagið les sem vorfluga, fullorðið rykmý eða klakvilla eftir stærð og lit. Svarta útgáfan í #16–20 er sérlega góð eftirlíking af rykmýi og bitmýi

Meðhöndlun skiptir öllu: aðeins púðurflot (Frog's Fanny eða sambærilegt), aldrei gel. Gel klessir CDC-fjöðrina og flugan er ónýt. Þegar hún sekkur má einfaldlega veiða hana í yfirborðsfilmunni sem klakvillu.