Carey Special

Þetta er fornfræg fluga frá Bresku Kólumbíu á vesturströnd Kanada og hún á sér farsæla sögu meðal veiðimanna þar. Ekki er vitað með vissu hvenær þessi fluga fékk viðurnefnið Carey Special en það var örugglega á millistríðsárunum 1918 – 1934 eins og ég hef rakið í smá grein hér á FOS.

Það má næstum segja að þessi fluga sé einnar efnis fluga, þ.e. upprunalega var aðeins notast við þrjár mismunandi fjaðrir fasana í hana og svartan hnýtingarþráð.

Flugan er skemmtileg blanda kanadískra urriðaflugna og hefðbundinna enskra votflugna, upprunalega löng og mikil, hlutföllin í henni þvert á allar forskriftir og langt og mikið hringvaf hennar lagðist jafn langt eða lengra aftur en skott hennar, sem var þó þegar í lengra lagi. Síðara tíma útfærslur þessarar flugu hafa flestar skipt fasanafjöðrinni í búki hennar út fyrir dub, garn eða umfangsmeira gerviefni eins og chenille. Einhverjum hnýtara hefði þótt þær breytingar nóg til að skýra hana upp á nýtt, en það er ekki raunin með Carey Special, upprunalegt heiti hennar hefur fengið að halda sér.

Uppskriftina hér að neðan má finna í bók Roderick Haig-Brown, The Western Angler sem kom út árið 1939.

Það hnýtingarmyndband sem samræmist þessari upprunalegu uppskrift einna best að mínu mati gerði Matt O’Neal árið 2001, jafnvel þó inngangur hans sé ekki alveg kórréttur.